Battle 雞蛋仔 鬥新餡味

十幾廿種款式點揀好
Battle Egg Waffles
作者:Ann Chiu |
廣告

雞蛋仔,香港引以為傲的街頭小食之一,簡單以雞蛋漿加糖加麵粉加發粉等調勻成漿底,倒入鐵模,一夾一反,烘脆成外脆中間綿密口感的美味小食。近年來更新興各種口味的有餡雞蛋仔,如蝦乾、肉鬆、油炸鬼、臘腸等,齊齊鬥賣相鬥創新口味,最緊要相機先食!今次我們找來全城最熱的六家雞蛋仔店大比拼,睇吓邊間最多花臣?

餐廳

摩豆︰人氣長龍店

icon-location-pin 太子

位於旺角花園街的摩豆,長期排人龍,主打超過十款雞蛋仔口味,最特別係有坊間少有嘅斑蘭味、積及橙朱古力味、肉鬆蝦乾味,以及羅宋湯口味雞蛋仔。今次我哋試咗佢嘅積及橙朱古力($23)同斑蘭雞蛋仔($19),前者橙香味强勁加埋半溶朱古粒,真係好有積及 feel!至於斑蘭雞蛋仔,斑蘭味較清淡自然,唔似落香精,食到有蛋香。質感方面,剛做起時,兩者賣相都挺身,中心填滿餡料,外脆內軟,略嫌外層較快變腍。

Time Out 說
餐廳

媽咪雞蛋仔︰㗎仔都識

icon-location-pin 佐敦

媽咪雞蛋仔於港九新界有超過十間分店,因早前接受過日本電視台訪問,吸引了不少到港的日本旅客都話要試雞蛋仔。這裏的雞蛋仔口味特別多,差不多 keep 住有15款選擇,而且定期會推出新口味,好似最近就鹽燒紫菜粟米、麻辣肉鬆、有機栗子等。試了鹽燒紫菜粟米($30),一攞上手已感到油分好重,咬下香脆的外層,有少少蛋糕質感及零零散散的粟米粒,蛋香不足,而鹽燒紫菜就是油膩的根源,吃罷半份已覺得很膩滯。

Time Out 說
廣告
餐廳

乜嘜雞蛋仔︰街坊小店 CP 值高

icon-location-pin 佐敦

家庭小店式經營,除了賣雞蛋仔,都有燒賣魚蛋等街頭小食供應,放學時間經常要排長龍。雞蛋仔有七、八款創意口味,好似較受歡迎嘅抹茶紅豆、熔心芝士及咖啡朱古力味。熔心芝士($25),每格都有放入芝士方粒,咬下香脆的雞蛋仔,堅係做到粒粒爆芝效果,鹹甜味融合適中,富有蛋香,整體質素很高。另一款咖啡朱古力味($23),雞蛋仔也夠飽滿,做到外脆,內裏綿密軟心,咖啡味算濃,加埋半溶朱古力,味道好夾。

Time Out 說
餐廳

士叻哥︰一底兩味

icon-location-pin 深水埗

深水埗這個親民的美食天堂有一間港式小食店好受街坊歡迎,主打多款特色雞蛋仔,如特濃芝士、黑朱古力、香蕉、餐肉、肉鬆、蟹柳等,仲有近期大熱嘅鹹蛋黃,最正係可以自選雙拼口味。鹹蛋黃拼餐肉($20),鹹蛋黃碎甘香起沙,同餐肉好夾,而且雞蛋仔做得外層夠脆,蛋香味濃,夾心有少少蛋糕質感,鹹鹹甜甜,味道過癮。值得一讚,雖然加咗餐肉,但食落都唔算太油膩。

Time Out 說
廣告
餐廳

摩芽︰星星搶眼

icon-location-pin 太子

憑着「來自星星的雞蛋仔」打出名堂,摩芽在短短不足兩年已擴充至五間分店,除了招牌星星雞蛋仔之外,更有不少創新花款,如流心蜂蜜雞蛋仔、辛辣香濃的咖喱肉鬆、粟米肉鬆、鳳梨酥等都好受歡迎,而且每月定期推出一至兩款新口味,保持新鮮感。紫薯星星雞蛋仔($30)每粒都頂部都有粒星星脆米,配搭紫色雞蛋仔,對比鮮明,搶眼度高,最重要係──好好食﹗本身外層都已經夠脆,加埋脆米,多重口感非常夾;入面的紫薯軟滑有紫薯香,又唔會過甜,抵讚﹗但由於製作需時,非繁忙時段都要等約20分鐘,要俾啲耐性。

Time Out 說
餐廳, 雪糕店

Oddies︰IG 之選

icon-location-pin 中環

2014年開業的 Oddies,是最先把雞蛋仔變成雪糕新地的始祖,仲有意大利低脂雪糕同自家製抹茶雪糕、海鹽雪糕俾你揀,多款配料包括肉桂脆脆、橘子啫喱、香脆牛油酥等。老闆出身自法國藍帶廚藝學校,對甜品用料和做法都講究,雞蛋仔口味也不少,如蘋果批、雲呢拿米飯布甸、肉鬆油炸鬼及臘腸等。臘腸雞蛋仔($30),賣相挺身飽滿,咬下香脆,內裏半滿蛋糕質地,臘腸切得細碎,甜甜地。由於每粒雞蛋仔都有臘腸粒,臘腸油分太勁,吃了半份已有點膩滯。

Time Out 說
廣告

總結

摩芽的「來自星星的雞蛋仔」無論在賣相和味道方面都令人滿意,雖然等候時間較長,但慢工出細貨,為咗一口完美的雞蛋仔,絕對值得等﹗

相關文章

餐廳

Battle 四大邪惡西多 越邪惡越好食﹗

西多士, 本身已是邪惡的化身。假如再要喺兩塊麵包中間狠狠地加入饀料,就等同將邪惡加倍﹗今次 Time Out 揾嚟城中四大有饀西多士,有鹹有甜有爆流心,睇吓邊款最邪惡、最有內涵兼最得我們歡心?

廣告