0 喜愛
儲存

城中必試叉燒飯

Time Out 實試叉燒飯,由貼地價食到堅離地,豐檢由人

「生嚿叉燒好過生你﹗」阿媽講得啱, 一件入口鬆化嫩腍又有咬口的燶邊肥叉,油香夾肉香,再扒一啖熱騰騰的絲苗白飯,足以滿足口腹,迷倒老饕,絕對係港人最愛嘅 comfort food﹗今次 Time Out 試咗城中四間叉燒飯,由最平$21食到最貴$315,睇吓平嘢有冇好,貴嘢又係咪一定好食?

新光明燒臘︰CP 值最高
1/4

新光明燒臘︰CP 值最高

藏身於油麻地街市的街坊燒臘店, 燒臘飯只限外賣,但店舖旁邊後巷位置擺放了兩三張枱櫈,唔怕地踎可以坐低慢慢食。這裏的叉燒每日以新鮮豬肉炮製,柯打時可要求要瘦叉或半肥瘦。今次試了瘦叉飯,叉燒唔算好腍身,但食落無渣又唔嚡口,也有肉汁,可惜無乜燶邊位,少咗焦香。味道方面,外層蜜汁唔太甜,肉質略嫌鹹咗少少,適宜伴飯吃。值得一讚,白飯夠爽身而且配菜多,淋上自家製的油汁,撈飯一流。以$21/盒叉燒飯的價錢嚟講,仲送埋例湯,邊度揾吖,真係超晒值﹗

Time Out 推介指數︰4/5

查看更多
佐敦
太興︰特搜叉燒
2/4

太興︰特搜叉燒

燒味連鎖店之中,以太興的叉燒最有名。這裏出名的特搜叉燒飯,最適合鍾意食瘦叉的朋友。叉燒選用脢頭肉,夠瘦夠鬆化,但肉質偏實肉汁少,色水亦欠光澤;切件厚度不一,偏薄, 影響咬口。味道方面則較淡身,提議加些薑茸撈飯會更好味。套餐勝在有肉有飯包飲品($61),冇期望所以不會失望。

Time Out 推介指數︰2/5

查看更多
尖東
西苑酒家︰大哥最愛叉燒
3/4

西苑酒家︰大哥最愛叉燒

西苑的大哥叉燒風靡唔少名人,起源於九十年代,因深得大哥成龍歡心,所以酒家索性將叉燒註冊為「大哥叉燒」,自此紅遍全港。大哥叉燒之所以好食,全因師傅識裁肉 — 肥瘦相間的脢頭肉,要按紋理裁出非常平均的半肥瘦部分,燒出來的叉燒才特別甘香鬆化。當然醃料都好緊要,有海鮮醬、柱侯醬、蜜糖、薑汁、麥芽糖等醃製,味道平均,有肉味有酒香,不會大鹹大甜,帶少少的燶邊,焦香吸引。亮點是厚切,如麻將般厚,咬下去肉汁和油分從口腔中爆出,連埋啲叉燒汁撈飯食絕配﹗要留意,這裏不設碟頭叉燒飯,想食就要叫散叫叉燒($128/碟)和白飯($16)。

Time Out 推介指數︰5/5

查看更多
銅鑼灣
卅二公館︰全城最貴
4/4

卅二公館︰全城最貴

4 / 5星

位於中環渣打銀行大廈地庫的高級中菜館,這裏的叉燒飯肯定是城中數一數二 — 貴(叉燒$295/碟,白飯另加$20),不過當你試過之後,又會覺得值得回票價。

叉燒,選用西班牙黑毛豬最嫩的後頸近肩部位,加入叉燒醬及自家混入七種調味料醃製一小時,先以大火烤30分鐘鎖住肉汁,再轉小火烤焗10分鐘至肉熟透。之後再掃上麥芽糖及加拿大黃山蜜糖,閃亮亮的,叫人垂涎。 叉燒看似偏瘦的,但入口卻非常的鲜嫩多汁,有咬口得來鬆化,仲特別有肉香,邊位略微烤焦,甘香惹味。面層那薄薄的蜜糖,也份外清甜,比一般只上麥芽糖的叉燒,甜得來更有層次;配上白飯,令每一口叉燒飯都充滿滋味貴氣。人一世物一世,不妨豪一次﹗

Time Out 推介指數︰4/5

查看更多
中環

相關文章

香港10大最强豬扒飯

豬扒跟飯,向來都是誘惑味蕾的最佳拍檔。地位就等同本港經典的叉燒飯, 是最貼地的美食之一。然而,豬扒飯花款多多,質素有高有低,尋尋覓覓,要吃,就一定要挑最好的來吃﹗

查看更多

評語

0 comments