實試潮味杯麵

無論你係餓底定夜鬼,梗有一款啱你口味
作者:Ann Chiu |
廣告

杯麵係唔少餓底嘅精神食糧,不論係打機打到三更半夜又或者 OT 忙到連飯盒都冇時間食,一個杯麵,三分鐘,就能慰藉肚皮,方便到極。今次我哋揾嚟五款新奇口味嘅杯麵,究竟係伏味定好味?又如果杯麵都唔能夠滿足到你,我哋仲試埋一款即食無火火鍋,15分鐘就食得,即刻睇下食唔食得過﹗

Haudiao chicken cup noodle

花雕雞麵︰淡淡酒香

喺台灣一度賣斷市的花雕雞碗麵,碗內有四個小包:雞肉調理包、調味粉包、佐料包和花雕料理酒包,好似好豐富。包裝建議雞肉包先坐熱水泡五分鐘;然後碗麵加雞肉及佐料包,落滾水,焗三分鐘。記得記得最後先落花雕料理酒包,撈勻就搞掂﹗麵條爽幼彈牙,湯頭帶淡淡酒香,不會過濃味道剛好,就算放涼咗一陣再食,都仍然好味。雞肉細細塊,雖然有啲「嚡」,但可以接受。如果糧尾只能食杯麵,呢個雞麵絕對係不二之選。

需時︰8分鐘
Time Out 推介︰5/5

Tomato pizza cup noodles

大杯裝 Pizza 番茄味︰可當湯飲

日版合味道大杯裝 Pizza 番茄味 ,配料有車打芝士、番茄、薯仔和椰菜等。番茄味超濃郁,當湯飲都唔錯﹗芝士味則較淡,麵條偏腍,口感一般,勝在大大杯,頂到飽肚。

需時︰3分鐘
Time Out 推介︰3/5

廣告
matsutake cup noodles

松茸濃厚三重芝士︰重口味之選

日版合味道芝士忌廉松茸杯麵,一加熱水,即聞到濃濃芝香,皆因入面包含咗三款芝士:有巴馬臣、車打及埃文達芝士 ,不過食落味道似忌廉湯底多啲。松茸方面,係有幾片,煙煙韌韌的,但講真食唔出松茸味。麵條比較粗身,有掛汁效果,不過偏腍。

需時︰3分鐘
Time Out 推介︰3/5

Cheese curry cup noodles

歐風芝士咖喱味︰升級版咖喱

合味道嘅咖喱味杯麵一向好受歡迎。呢款日版歐風芝士咖喱味,將咖喱味升級,甜甜微辣的辛香融合了幼滑的芝士,層次豐富,食完杯麵,簡直都想將個湯打個芡撈飯;配料方面都是杯麵的招牌肉塊和蔬菜乾,驚喜欠奉。

需時︰3分鐘
Time Out 推介︰4/5

廣告
Samyang wasabi mayo stir noodles

韓國芥末蛋黃醬撈麵 ︰味道單調

假如湯麵唔啱胃口,試試呢款韓國三養牌芥末蛋黃醬撈麵,只需沖泡麵後倒出水分,加入特製醬油、芥末醬和蛋黃醬撈勻就食得﹗雖然差不多撈咗一湯匙芥末醬,但蛋黃醬份量也不少,所以唔算太嗆太辣;麵質適中不太腍,可惜配料少得可憐,整體味道單調,試過就算。

需時︰3分鐘
Time Out 推介︰2/5

Butter and numbing spicy flavour instant hotpot

同場加試﹗9515海底之戀︰無火火鍋

香港人最愛打邊爐,呢款無火火鍋就最啱。9515 香港版即食牛油麻辣口味海底撈火鍋,內有蔬菜包、即食腸、薯粉包、火鍋底料和香油。只要將所有配料和火鍋底料放入白色盒,下面的黑色盒則放發熱包,加少少凍水,即刻噴煙發熱,冚蓋煮等15分鐘就食得。麻辣味湯底當然唔會煮到滾熱辣,但味道少少麻充滿孜然香味,唔算勁辣。配料方面蓮藕和木耳都很爽口;薯粉口感太煙韌,有啲似咬橡筋;腸仔唔好期望好好食。整體來說,如果孤單一人邊爐癮起,可以一試。另有其他口味,包括番茄味、番茄牛肉和鴨肉。

需時︰15分鐘
Time Out 推介︰3/5

相關文章

餐廳

Battle 四大蛋治王

幸福滋味可以好簡單。平凡如蛋治。早晨一口,喚醒了無數人的惺鬆睡眼;三點三,又為營營役役的打工仔,頃刻帶來窩心暖意。 香港地,有不少冰室茶記都各「治」為正,今次 Time Out 就暗試城中四大人氣蛋治,鬥香鬥厚鬥 creamy,且看誰是真正蛋治王﹗ 

廣告
This page was migrated to our new look automatically. Let us know if anything looks off at feedback@timeout.com