將我們加到你的收件箱

搜尋

佐楽 Sara

  • 餐廳
  • 銅鑼灣
  • 4/5星
  • 推薦
  1. 佐楽 Sara
    Photograph:Ann Chiu
  2. 佐楽 Sara
  3. 佐楽 Sara
廣告

Time Out 說

4/5星

全港首間佐賀主題居酒屋 服務一流食物佳

在香港要食日本菜好容易,但這間居酒屋打正旗號提供佐賀縣最正宗的料理和地酒,以串燒及時令刺生做主打,九成食材由佐賀即日直送,全港獨有。居酒屋面積不算大,只有約30個座位, 地道居酒屋格局,放有佐賀傳統工藝有田燒作擺設,裝潢摩登簡約,連餐具也貼合主題,用上佐賀有田燒瓷器,每隻餐碟都好有手感。

打開餐牌,菜式以佐賀特產作分類,如三瀬雞、金星佐賀豚、佐賀牛、海男致心養殖 Otofuse 生蠔、有明海苔等,提供刺生、沙律、串燒、天婦羅、丼物、主食和雜炊等,選擇繁多令人唔知點揀。幸好待應主動上前為我們詳細介紹每款菜式及當日的時令推介:原隻呼子魷魚刺身($498)、炭燒羽根蒜頭($98)、光樹凍番茄 ($98)和吉列佐賀西冷牛扒($338),聽起來好吸引,我們決定全部點下來。

由於我們坐在高身長吧枱,面向半開放式廚房除了可近距離欣賞主廚的技藝,最正係,可以同兩位師傅直接請教有關菜式的做法和食法。打頭陣是原隻呼子魷魚刺身,牠是唐律市呼子町的名產,師傅說魷魚捕獲後會立即以零下200度急凍直送到港,所以能保持極度新鮮的狀態。刺身通透亮澤、鮮甜無比,加上師傅刀功一流,細緻的𠝹花,咬落柔軟無渣;師傅建議我們先食魷魚身,留下足鬚及鮨部,再為我們炮製天婦羅──換上金黃脆皮外衣的魷魚,味道更是甜美,一魷兩食,絕對值得推介。 

前菜光樹凍番茄 ,甜度很高,喜歡的話可以撒一丁點海鹽吊味,質感也很好,爽口多汁,非常新鮮。特色農產還有炭燒羽根蒜頭,連根連嫩芽一齊燒,味道香甜,蒜味不是太濃,食完唔會口臭。重頭戲是吉列佐賀西冷牛扒,用上A5級數,脆薄外層包裹着炸至三成熟嫩粉紅色西冷,一定要趁熱食,入口即溶;雖說好食,但多食兩三件難免會有一點點油膩感,適宜約多幾個朋友來 share 這道菜。

吃着吃着,師傅突然遞上一小杯精緻的冷菜小吃:「請你哋食吖﹗呢個係左口魚魚肝及魚春醬汁煮,今朝劏咗一條靚左口魚,唔好嘥。」魚肝口感細膩潤滑,魚春很鮮很入味,面頭放有柚子皮點綴,一齊食,感覺好新清。三瀨雞濃湯豆乳製麵也有驚喜,原來佐賀縣是著名的大豆生產地,這款以大豆製成的扁麵,滑溜彈牙,細嚼滲出淡淡的豆乳香氣,先喝一口清澈的雞湯,然後加一點兒柚子胡椒提味,即可試到另一種滋味。輪到甜品,也沒有令我們失望,簡單如綠茶布甸($88)也不馬虎,以佐賀嬉野茶製成,茶味濃郁,唔會太甜仲帶點回甘。

除了食物質素絕佳,這裏服務也值得一讚,不論是待應、經理或廚師,都非常樂意解答我們對菜式的任何提問,而兩位主廚更是風趣健談,先後請我們試食三碟小吃;某些菜色如豆乳製麵,又會預先按人數分好一人一碗上枱,認真貼心。當晚仲坐有幾枱日本客人,談笑風生,好不熱鬧,令我們差點以為自己去咗日本。這裏絕對是個讓人放鬆、開心用餐的好地方,一定會再去幫襯試吓佢哋嘅串燒﹗

Ann Chiu
撰文:
Ann Chiu

詳情

地址:
銅鑼灣霎東街15-21號12樓
香港
開放時間:
11am-3pm, 6pm-11pm
廣告
你或許也會喜歡
你或許也會喜歡